Category: Turismo e tradizioni

Proverbi

Ci và a Verona a piè
ghe vol tre ore e anca piassè

Ci ga gamba bona
in siè ore el va el vien da Verona

Dòna sempre rabià
o l’è sensa schei o l’è trascurà

Se la recia sanca te siga
o te sì fortunà o pien de fadiga

Se la recia drita te siga
o te sì imbriago o gh’è un che te castiga

Libri, dòne e cavai, no se impresta mai

Che la piasa, che la tasa e che la staga in casa

L’omo pien de vin el te parla anca in latin

A trincar sensa misura, tanto tempo no se dura

Robar poco se va in galera, robar tanto se fa cariera

ogni can mèna la coa, ogni mona vol dir la soa

Se la dòna no la vol, l’omo nol pol

Tempo, cul e siòri, i fa sempre quel che i vol lori

Nuvole a pecorela, slonga el paso e tol sù l’ombrela

Poesia

“Requiam eterna a me pòro marì”

Steme a sentire, o anime bone,
voi darve on consiglio riguardo a le done.

Quando jè da sposare, jè tute angioleti,
ma dopo du mesi jè tute dialoti.

Qualcuno ch’el dise son omo e comando,
mi invese ghe digo: l’è el cuco pi grando !

Mi si ghe n’ò una de quele che intendo,
e se ghe ci la compra, par poco la vendo.

Ghe dago la cipria e anca el rossetto,
ghe struso la polvar da insìma al bufeto,
ghe spasso la casa, ghe fasso sul el leto,
ghe misio in la teja, ghe curo i fasoi
tastando de sale, ghe lavo i fassoi.

Quan’gò do palanche ghe dago el taquin,
ghe lavo la boca, ghe fao fare el pisin.

Ghe simo le ongete e ghe fao su le fasse,
ghe grato la rufa, ghe inbiasso le pape,
ghe sugo le pesse, ghe struso le cache.

Ghe fao le busete, ghe taco i botoni,
ghe lustro le scarpe, ghe infilo i cordoni.

Ghe guerno la cioca, ghe parpo la pai,
ghe mondo la cavra, ghe undo i bocai.

Par quanto che faga non l’è mai contenta,
sè po me lamento la fà ‘na sentensa.

Ma quando l’è al sabo e che tiro la paga,
alor la me dise: bison che te basa !

Se po’ me imbriago calche ‘olta la festa,
la va su le furie e la perde la testa.

La ciapa la mescola e anca el cortelo,
la core sigando: vigliaco, te pelo !

Ma quan’ me inacordo mi scapo, vedìo,
che quasi le gambe le toca el dedrio.

‘na olta scapando, non so in che maniera,
m’inciampo in t’on sasso e me cato partera,
mettendo la boca, non so se l’ò dita,
andòe che on galo l’à fato ‘na schita.

E dopo ve digo,con on po’ de vergogna,
che soto el capelo gò ancora la togna.

E po, per finirla bison che ve lassa,
parchè la storiela la ienta un po’ grassa.

E riguardo le done le dise cossì:
requiam eterna a me poro marì.

Filipozzi Cesarino
“Coeta dai Morini”